Turi nis nga porti i Butrintit/Ksamilit, ku lundrohet përmes kanalit të Vivarit dhe kalohet në liqen. Gjatë lundrimit, pamja e kalasë trekëndore shfaqet mahnitëse nga ana e djathtë, ndërsa nga e majta dominon kulla veneciane. Një moment i veçantë është lundrimi përmes portave të peshkimit, dajlanet sic njihen në gjuhën e peshkatarëve.  Pas kalimit të këtyre porteve, drejtimi është për në Portën Skea, ashtu siç bëri edhe hero i Trojës, Eneua, para 2000 vitesh. Ai ndaloi për një pushim të shkurtër në këto troje para se të vazhdonte udhëtimin e tij drejt themelimit të Romës.

Duke vazhduar përtej, dallohen strukturat e fermave të midhjes në liqen dhe lundrohet drejt tyre. Aty shikohet nga afër kultivimi i midhjeve, mësohet për metodat e kultivimit dhe si një kujtim nga ky tur, merren disa midhje me vete. Më pas, vazhdohet lundrimi drejt Kalivuas, një tjetër vend me rëndësi historike të Butrintit. Kalivua, e njohur si “shtëpia e pasanikut”, ishte vendpushimi i Atticus-it, mikut të famshëm të Ciceronit. Gjatë udhëtimit drejt Kalivuas, ndahen midhjet që janë mbledhur, duke kaluar 15 minuta pune, lundrim dhe meditimi në natyrë.

Pasi arrihet në molin e Kalivuas, drekohet në natyrën e qetë dhe relaksuese të bregut, të rrethuar nga shelgje. Gjatë drekës, shijohen tre lloje gatimi me midhje, perime të freskëta, bukë të sapo dalë nga furra më e njohur e Xarre, si dhe verë të bardhë. Kjo shije autentike e tokës sonë do të shërbehet me dashuri nga familja e Lulos. Pas një dite të paharrueshme, kthimi është në portin e Butrintit/Ksamilit!