Udhëtimi fillon në qytetin e Beratit, një thesar i Shqipërisë, i përfshirë në listën e Trashëgimisë Botërore të UNESCO-s. 

Ndalesa e parë është në Kantina Nurellari  (Fushë-Peshtan, Berat), një kantinë me rrënjë të thella familjare, ku përkushtimi dhe pasioni për verën janë trashëguar ndër breza. 

Fare pranë ndodhet  Kantina Pupa (Fushë-Peshtan, Berat), një tjetër prodhues i shquar në të njëjtën zonë, e cila ruan autenticitetin dhe cilësinë në çdo shishe. 

Më pas, udhëtimi vijon drejt fshatit piktoresk të Roshnikut, ku ndodhet Kantina Alpeta. E vendosur mes kodrave me vreshta, kjo kantinë ofron jo vetëm verë me shije të veçantë, por edhe një pamje mahnitëse mbi peizazhin përreth. Është një vend ku natyra, mikpritja dhe tradita bëhen një.

Kantinën Çobo në zonën e Dimalit, një nga kantinat më të njohura të Beratit. Me rrënjë të thella familjare dhe një reputacion të ngritur mbi cilësinë, vera e Çobos është simbol i pasionit dhe profesionalizmit.

Më tej, udhëtimi na çon drejt jugut, në Patos, ku ndodhet Kantina Arianiti. Kjo kantinë është një shembull i suksesit të brezit të ri të prodhuesve shqiptarë të verës. Me një përkushtim të veçantë ndaj cilësisë, Arianiti ofron një eksperiencë të rafinuar degustimi.

Në rrugën e kthimit, ndalemi për një moment reflektimi dhe eksplorimi në Parkun Arkeologjik të Apolonisë. Mes rrënojave antike dhe qetësisë së fushave përreth, ky vend ofron një ndjesi të veçantë për trashëgiminë që Shqipëria ruan në çdo cep.

Për ta përmbyllur këtë tur të shijes dhe kulturës, ndalesa e fundit është në Kantinën Albanica në Ardenicë. Kjo kantinë bashkon mjeshtërinë tradicionale të verës me teknologjitë më të reja, duke krijuar një përvojë unike për vizitorët që kërkojnë diçka më shumë se thjesht një gotë verë.